БЖЗҚ салымшылары біржолғы зейнетақы төлемдерін көбінесе тұрғын үй сатып алуға және емделуге пайдалануда
« НазадҚызылорда облысы бойынша БЖЗҚ салымшылардың (алушылардың) тұрғын үй жағдайларын жақсарту мен емделулері үшін зейнетақы жинақтарын пайдалану туралы 16 166 өтініш қаралды. (2021 жылдың 22 тамыздағы жағдай бойынша).
Тұрғын үй жағдайын жақсарту үшін облыс бойынша БЖЗҚ шамамен
10 816 өтінішті орындай отырып, 34 млн. 611 мың теңгені салымшылардың арнайы шоттарына аударды.
Орындалған өтініштердің басым бөлігі «Отбасы банкі» тұрғын үй құрылыс жинақ банкі» АҚ арқылы берілген. Естеріңізге сала кетейік, «Отбасы банкі» тұрғын үй құрылыс жинақ банкі» АҚ уәкілетті операторында ашылған арнайы шотқа біржолғы зейнетақы төлемі түскеннен кейін, алушы уәкілетті операторға біржолғы зейнетақының тағайындалған мақсатын растайтын құжаттарды төлемдер түскен күннен бастап 45 жұмыс күні ішінде (Қазақстан Республикасының заңнамасына сәйкес тұрғын үй жағдайын жақсарту үшін біржолғы зейнетақы төлемдерін пайдалану ережесінің 13-тармағына сәйкес) ұсынады. Белгіленген мерзімде уәкілетті операторға растайтын құжаттар ұсынылмаған жағдайда, бұл қаражат БЖЗҚ-ға қайтарылуға жатады. Сонымен қатар, зейнетақы жинақтарын пайдалану кезінде азаматтар уәкілетті операторлар арқылы жылжымайтын мүлікті тіркеу кезінде өтініште көрсетілген мақсатты өзгертуге құқылы.
Салымшы аударылған соманы БЖЗҚ-ға көрсетілген мерзімді күтпей-ақ, «Отбасы Банкі» тұрғын үй құрылыс жинақ банкі» АҚ-на өтінім беру арқылы қайтара алады, оны банк алушыдан қайтару туралы өтініш алған күннен бастап
3 (үш) жұмыс күні ішінде орындауы керек.
Екінші деңгейдегі банктер болып табылатын уәкілетті операторлар біржолғы зейнетақы төлемдерін олардың мақсатты тағайындаулары бойынша БЗТ сомалары арнайы шотқа түскен күннен бастап 3 жұмыс күні ішінде аударады.
22 тамыздағы жағдай бойынша орындалған өтініштерде зейнетақы жинақтарын пайдаланудың келесі мақсаттары көрсетілген:
- азаматтық-құқықтық мәмілелер бойынша тұрғын үйді жеке меншікке сатып алуға (толық есеп айырысу);
- жеке тұрғын үйдің құрылысына (жер учаскесін сатып алуды қоса алғанда);
- тұрғын үй сатып алу үшін ипотекалық тұрғын үй заемын алу үшін бастапқы төлем жасауға (оның ішінде ислам банкінің қаржыландыру шеңберінде);
- тұрғын үй ипотекалық несиесі бойынша қарызды ішінара өтеуге (оның ішінде ислам банкінің қаржыландыру шеңберінде);
- ипотекалық тұрғын үй заемы бойынша қарызды толық өтеуге (оның ішінде ислам банкінің қаржыландыру шеңберінде);
- ипотекалық несиені қайта қаржыландыруға;
- тұрғын үй құрылыс жинақ жүйесі бойынша ипотекалық тұрғын үй несиесін алуға;
- тұрғын үй құрылыс жинақ жүйесі бойынша ипотекалық несие бойынша қарызды ішінара өтеуге;
- тұрғын үй құрылыс жинақ жүйесі бойынша ипотекалық несие бойынша қарызды толық өтеуге;
- тұрғын үй құрылыс жинақ жүйесі бойынша ипотекалық несиені қайта қаржыландыруға;
- тұрғын үй құрылыс жинақ жүйесі бойынша жеке тұрғын үй құрылысын салуға (жер телімін алуды қоса алғанда) - сатып алу құқығы бар жалдау шартымен қарызды ішінара өтеуге;
- сатып алу құқығы бар жалдау шарты бойынша қарызды толық өтеуге.
Қызылорда облысы бойынша БЖЗҚ емделу мақсаттары үшін жалпы сомасы 997 млн. теңге сомасына 1 191 өтінімді орындады. Біржолғы зейнетақы төлемдерін емдеу үшін пайдалану жөніндегі уәкілетті оператор - «Отбасы Банкі» тұрғын үй құрылыс жинақ банкі» АҚ болып табылады. Егер алушы БЖТ мақсатты пайдалануды растайтын құжаттарды 45 күн ішінде ұсынбаған болса, олар уәкілетті оператордың арнайы шотынан салымшының жеке зейнетақы шотына кері қайтарылады.
Қазіргі уақытта БЖЗҚ зейнетақы активтерін сенімгерлікпен басқару туралы төрт ИПБ-мен шарт жасасты. Сіз олардың инвестициялық декларацияларын enpf.kz веб-сайтындағы «Қызметтер» – «Инвестициялық портфельді басқарушылар тізілімі» бөлімінен көре аласыз. Айта кетейік, олар «Jusan Invest» АҚ, «Halyk Global Markets» АҚ, «BCC Invest» АҚ, «Сентрас Секьюритиз» АҚ болып табылады.
БЖЗҚ-дан зейнетақы активтерін алғаннан кейін ИПБ оларды ҚР Ұлттық Банкі Басқармасының 2014 жылғы 3 ақпандағы №10 қаулысымен бекітілген Инвестициялық портфельді басқару жөніндегі қызметті жүзеге асыру қағидаларында көрсетілген және ИПБ инвестициялық декларациясында көзделген рұқсат етілген қаржы құралдарына инвестициялайды.
Зейнетақымен қамсыздандыру туралы Заңға сәйкес, ИПБ инвестициялық басқаруды жүзеге асырғаны үшін комиссиялық сыйақы алуға құқылы. ИПБ сыйақысының шекті шамасы алынған инвестициялық табыстың 7,5% аспауы тиіс. Комиссиялық сыйақының нақты шамасын жыл сайын ИПБ-ның басқарушы органы бекітеді және ол жылына бір рет қана өзгеруі мүмкін.
Салымшы зейнеткерлік жасқа толғанға дейін Ұлттық Банктің басқаруында болатын зейнетақы жинақтарына инфляция деңгейі ескеріліп отыратын сақталу кепілдігі қолданылады. Зейнетақы жинақтары ИПБ-ның басқаруына аударылған жағдайда, мемлекеттік кепілдік басқарушы компанияның зейнетақы активтерінің ең төменгі кірістілік деңгейін қамтамасыз ететін кепілдігімен алмастырылады. Кірістіліктің ең төменгі деңгейі нарықта әрекет ететін ИПБ-ның басқаруына берілген зейнетақы активтерінің орташа алынған кірістілігі негізге ала отырып есептелінеді.
2021 жылдың 22 тамыздағы жағдай бойынша зейнетақы жинақтарының бір бөлігін инвестициялық портфельді басқарушыға аудару туралы өтініштерінің саны мен сомасына тоқталатын болсақ, Қызылорда облысы бойынша БЖЗҚ-ға келіп түскен өтініш саны-50 бірлік, оның ішінде қабылдаудан бас тартылғандар-9 бірлік, өңдеуге қабылданғандар-2 бірлік. Барлығы 39 өтініш бойынша 43 млн. теңгенің төлемдері арнайы шотқа аударылды.
«БЖЗҚ» АҚ баспасөз орталығы.